28.07.2020 - 317 - Sosial
“Dəstək ol!” - www.destekol.az - layihəsinin həyata keçirilməsində
məqsəd cəmiyyətdə ehtiyacı olan insanlara yardım etmək arzusunda olan
fərdlər, eləcə də müvafiq xidmətlərə ehtiyac duyan fərdlər arasında
ünsiyyət və əlaqə körpüsünün yaradılmasıdır.
“Dəstək ol!” layihəsi könüllü, ictimai fəaliyyətdə sizin vasitəçiniz
olacaq. İnsanlara yardım edərək, çöhrələrində və həyatlarında bir şölə
yandırmaq, onlara sevinc bəxş etmək arzusunda olan insanlar məişətdə
istifadə etmədikləri maddi ləvazimatlarını (kitab, oyuncaq, geyim,
mebel, ev əşyaları, qida və s.) qarşılıqlı faydalanma prinsipi əsasında
ehtiyacı olan insanlarla paylaşma imkanı əldə edəcəklər.
Həmçinin, müxtəlif peşə sahibləri fəaliyyət göstərdikləri sahələr üzrə
ehtiyacı olan fərdlərə ictimai əsaslarla xidmətlər (hüquqi xidmət,
təhsil xidməti, tibbi xidmət və s.) təklif edə biləcəklər.
Belə ki, yardım edəcək fərdlər, eləcə də yardıma dəstək duyan fərdlər
platformaya daxil olaraq qeydiyyatdan keçə və əks olunan iki bölmədə
(“Ehtiyacım var” bölməsi, “Təklifim var” bölməsi) müvafiq xidməti təklif
edə, eləcə də əldə edərək bəhrələnə bilərlər.
Ehtiyacı olan insanlara ictimai əsaslarla, könüllü şəkildə yardım etmək
amalı ilə portala daxil olan şəxslər “Təklifim var” bölməsində paylaşmaq
istədikləri əşya(lar)ın fotolarını yerləşdirməli və başlıq hissədə qısa
məlumat qeyd etməlidirlər. Müvafiq olaraq çalışdıqları sahədə insanlara
xidmət ilə töhfə vermək arzusunda olan şəxslər qeyd olunan bölmədə
xidmətin məzmunu barədə və əlaqə imkanları barədə elan
yerləşdirməlidirlər.
Missiyamız – cəmiyyət üzvləri arasında könüllü fəaliyyətinin və ictimai
iştirakçılığın təmin olunması
Məqsədimiz – cəmiyyətdə faydalı könüllü fəaliyyətinin təşviq olunması,
cəmiyyətin həssas qrupuna daxil olan fərdlərinə xidmətlərin
əlçatanlığının təmin edilməsi və davamlı dəstəyin göstərilməsi
Bir-birimizə könüllü Dəstək Olaq !