8.01.2021 - 497 - Mədəniyyət
"Eurovision 2021” müsabiqəsində Azərbaycanı təmsil edəcək mahnının seçimi üzrə qəbula başlanılıb.
SHOWXEBER.AZ xəbər verir ki, İctimai Televiziya və Radio Yayımları Şirkətin İctimaiyyətlə əlaqələr şöbəsindən verilən məlumata görə, müsabiqənin mahnı seçimində iştirak etmək istəyənlər yanvarın 19-a qədər öz bəstələrini song@eurovision.az elektron ünvanına göndərə bilərlər.
Azərbaycanda rəsmi yayım hüququna sahib İctimai Televiziya və Radio Yayımları Şirkəti Hollandiyanın Rotterdam şəhərində keçiriləcək “Eurovision 2021” mahnı müsabiqəsində ölkəmizi təmsil edəcək mahnının seçiminə dair şərtlərini də açıqlayıb.
Şərtlərdə qeyd edilir ki, göndəriləcək mahnı demo versiyada hazır şəkildə səsləndirilmiş olaraq təqdim edilməlidir. Avropa Yayım İttifaqının (EBU) şərtlərinə əsasən mahnının xronometrajı 3 dəqiqədən çox olmamalıdır. Mahnı 2020-ci il sentyabrın 1-dən əvvəl ictimai resurslarda və KİV-də (televiziya, radio və ya internet vasitəsilə) yayımlanmamalıdır. Mahnı seçimi turunda iştirak edəcək hər kəs özü haqqında qısa məlumat təqdim etməlidir.
Qeyd edək ki, 18, 20 və 22 may tarixlərində Rotterdamda baş tutacaq “Eurovision” mahnı müsabiqəsində ölkəmizi “Efendi” adlı ifaçı təmsil edəcək.
Müsabiqədə Azərbaycan nümayəndə heyətinin rəhbəri isə bəstəkar İsa Məlikovdur.
Bizi instagramda izləyin
