Gəncədə daha 3 avtoxuliqan saxlanıldı

Gəncədə avtoxuliqanlıq edən gənclər saxlanılıb.


DİN-in Mətbuat Xidmətinin Gəncə şəhərindəki regional qrupundan SHOWXEBER.AZ-a verilən məlumata görə, Gəncə ŞBPİ DYPŞ əməkdaşları tərəfindən həyata keçirilən tədbirlərlə şəhər ərazisində yol hərəkəti qaydalarını kobud şəkildə pozaraq digər sürücülərə təhlükə yaradan, cəmiyyətə açıqca hörmətsizlik edən bir qrup sürücü saxlanılaraq barələrində qanunvericiliyə uyğun olaraq müvafiq tədbirlər görülüb.


Araşdırmalarla polis əməkdaşları tərəfindən saxlanılan, Gəncə şəhər sakinləri Arif Tağıyev, Asif Tağıyev və Toğrul Əliyevin müxtəlif vaxtlarda şəhərin bəlli küçə və yollarında avtoxuliqanlıq hərəkətləri etmələri məlum olub. 


"Chevrolet” və "VAZ 21074” markalı avtomobilləri idarə edərək yollarda intizamsızlıq edən, yol hərəkəti qaydalarını kobud şəkildə pozan bu şəxslər barəsində inzibati qaydada protokollar tərtib olunaraq baxılması üçün məhkəməyə göndərilib. Məhkəmə saxlanılan şəxslərin hər birinə 15 sutka həbs verib, onlar 1 il sürücülük hüququndan mərhum ediliblər.


Qeyd edək ki, ötən həftə də Gəncədə 4 avtoxuliqan saxlanılaraq hər birinə 15 sutka həbs verilib, onlar 1 il sürücülük hüququndan mərhum ediliblər.